Mindegi izena mintegi hitzaren aldaera bat da. Gogoko dudalako hautatu dut, baina, batez ere, blog honek lotura duelako bi mintegirekin.

Administrazioko bi itzultzaile-talderen mintegiak bideratzea egokitu zait urteotan: Gipuzkoako Foru Aldundian bat, 2003az geroztik, eta IVAPen beste bat, 2011z geroztik. Horri buruzko zertzelada batzuk jaso nituen Administrazioa euskaraz aldizkariaren 79. zenbakian, Itzulpen-mintegi iraunkorra artikuluan.

Orain, pentsatu dut irakurgai jartzea mintegi horietarako idazten ditudan zenbait ohar eta mintegietan ateratzen ditugun zenbait ondorio. Jende gehiagorentzat zerbait balio izatea espero dut, eta erantzunak jasotzea antzeko arazo edo pentsakizunekin ibili zaretenon aldetik. Gonbidatuta zaudete denok.

Patxi Petrirena Altzuguren dut izena, eta Elhuyarreko itzultzaile eta zuzentzailea naiz 2008az geroztik. Lehenago, helduen euskara-irakasle izan nintzen (1985-1992), Euskaldunon Egunkariko zuzentzaile eta euskara-arduradun (1992-2001), Itzulidatz taldearekin idazkuntza- eta itzulpengintza-ikastaroak eman nituen (1999-2003), eta legeak itzultzen aritu nintzen Euskal Herriko Unibertsitatearen Legeak-Leyes proiektuan (2003-2007). Bitarte horretan, EIMAren estilo-liburuko Morfosintaxiaren inguruko zalantzak eta argibideak liburua apailatzea ere egokitu zait. EIZIEren zuzendaritzako kidea naiz, eta, aspalditik, hark kudeatutako sareko guneetan ere parte hartzen dut: ItzuL posta-zerrenda, 2tzuL, 31 eskutik bloga…