mintzagaia 1 Posizioa eta puntuazioa. «Intsektu bektoreen kopurua murrizteko eta ziztada arriskua gutxitzeko ondorengo betebeharrak ezartzen dira». Koma behar da («honetarako eta honetarako, hau ezartzen da». Segidan datorren honetan, antzera, baina komarekin baino hobeto konpontzen dena ordena aldatuta: «Intsektuak hiltzeko baimendutako produktuak erabiltzea». Ez dira «intsektuak hiltzeko baimendutako produktuak», ezta? Konponbiderik onena ez da koma, egia esan: «baimendutako produktuak erabiltzea intsektuak hiltzeko», «produktu baimenduak erabiltzea intsektuak hiltzeko». 2 Testu hauetan, puntuazioa erabakigarria da (zeinu-tresneria urria dugu, eta gauza asko adierazi behar!). Mintzagaia komaz markatu behar da, eta haren esparruan ezin da besterik jarri. «Lehenbiziko galderan Ogasun eta Finantza Departamentuari galdetzen zaio ba ote dakien…». –> «Lehenbiziko galderan, Ogasun eta Finantza Departamentuari galdetzen zaio ba ote dakien…». 3 Mintzagaia eta galdegaia. Esaldi hau atera dut Justizia Administrazioaren jakinarazpen batetik: «Salatuak, epaiketan sortu diren kostuak ordaindu beharko ditu». Ez zait iruditzen salatua denik mintzagaia; aitzitik, kostuak izango da mintzagai, beti, era horretako testuetan: kostuak nork ordainduko ditu, kostuekin zer gertatuko da eta abar. Beraz, aipu dugun esaldi horren adierazpide normalak hauexek izan litezke: a) mintzagaia aurrean jarrita: «Epaiketan sortu diren kostuak salatuak ordaindu beharko ditu» (egia esan, nahasgarri samar gertatzen da “kostuak salatuak” hori). b) mintzagaia atzera eramanik: «Salatuak ordaindu beharko ditu epaiketan sortu diren kostuak». [2010eko otsaila]