Elhuyar Fundazioko hizkuntza-teknologien I+G taldekook Web-corpusen Ataria jarri dugu online. Bertan hiru baliabide jarri ditugu jendearen eskura: euskarazko corpus bat (125 milioi hitz ingurukoa) eta euskara-gaztelania corpus paralelo bat (18 milioi hitz ingurukoa), biak webetik automatikoki erauziak, eta lehenengotik automatikoki erauzitako hitz-konbinazioen kontsulta. Corpusak euskaraz dauden handienak dira bakoitza bere motakoen artean. Corpus biok eta konbinazioen-kontsultak baliabide garrantzitsua eta aurrerapauso handia dira euskararentzat, erabilgarriak baitira ez soilik hizkuntzalaritzarako, baizik eta baita hizkuntza-teknologien garapenerako ere.
Hizkuntza batentzat oso garrantzitsua da testu-corpusak (azterketa linguistikoak egiteko balio duten testu-bildumak) edukitzea. Duela denbora batetik hona, hizkuntzalaritza-lanetan ikerketak edo hizkuntza-estandarizazioan erabakiak datuetan oinarrituta egiten dira, eta datu horiek testuetako erabilerak ikusiz ateratzen dira. Beste lan-mota batzuetan ere oso baliagarriak dira, adibidez testu-sorkuntzan edo itzulpengintzan: hiztegietan agertu ez edo adibide nahikorik ez duten hitzak nola erabili edo nola itzuli izan diren argitu diezagukete.